DAGA GIDAN GWAMNATIN JIHAR KATSINA
SANARWAR MANEMA LABARAI
Gwamna Radda Ya Mika Ta'aziyyarsa ga Tsohon Ministan Gidaje, Ahmed Musa Dangiwa, Bisa Rasuwar Ɗan'uwansa.
Gwamnan Jihar Katsina, Malam Dikko Umaru Radda, ya miƙa saƙon ta'aziyyarsa ga tsohon Ministan Gidaje da Raya Birane na Tarayyar Najeriya, Alhaji Ahmed Musa Dangiwa, sakamakon rasuwar ƙaunataccen ɗan'uwansa, Alhaji Dikko Abdullahi.
Gwamna Radda ya bayyana rasuwar Alhaji Dikko Abdullahi a matsayin babban rashi, ba ga iyalan Dangiwa kaɗai ba, har ma ga dukkan waɗanda suka san marigayin saboda tawali'unsa, kyautatawarsa ga jama'a, da kuma sadaukarwarsa wajen yi wa al'umma hidima.
Gwamnan ya yi addu'ar Allah Maɗaukakin Sarki Ya gafarta wa marigayin kura-kuransa, Ya sanya shi cikin Aljannatul Firdausi, sannan Ya ba iyalansa da 'yan uwansa haƙuri, juriya da ƙarfin zuciya na jure wannan babban rashi.
Gwamnan ya ce: "A madadin Gwamnatin Jihar Katsina da ɗaukacin al'ummar jihar, ina miƙa saƙon ta'aziyyata ga Alhaji Ahmed Musa Dangiwa, gaba ɗaya iyalan Dangiwa, da kuma duk waɗanda wannan rashi ya shafa. Muna roƙon Allah Maɗaukakin Sarki Ya jikansa da rahama, Ya sa Aljanna ce makomarsa, Ya kuma ba iyalansa haƙurin jure wannan lokaci na alhini."
Hakazalika, Gwamna Radda ya buƙaci iyalan mamacin da su sami kwanciyar hankali ta hanyar tunawa da kyawawan halaye da rayuwar gari da marigayi Alhaji Dikko Abdullahi ya yi, tare da yarda da ƙaddarar Allah, yana mai tunatar da cewa kowane rai zai koma ga Mahaliccinsa.
Ibrahim Kaula Mohammed
Babban Sakataren Yaɗa Labarai na Musamman ga Gwamnan Jihar Katsina
08 ga Yuli, 2026
B ..Salwa Rtv Katsina..
Category
LABARAI..